السبت، 11 أكتوبر، 2008

صور حلوه لمسجد الشاطئ

بسم الله الرحمن الرحيم





اخر الاخبار فقط و حصريا على مدونتى العزيزه

بسم الله الرحمن الرحيم
من قديم الازل مكتبتش فى المدونه اللى اتملى فيها العنكبوت دى

بس قولت اجى انضف شويه و اهو نحكى مع بعض


امبارح بس كملت 19 سنه اخيرا و بعد عناء عام كامل و فعلا كانت السنه اللى فاتت دى سنه مليانه احداث و كانت سعيده عليا الحمد لله

و اتمنى انى اطور من نفسى السنه الجايه ان شاء الله و اتقرب لربنا اكتر و كل ده فى الحسبان
لكن اللى بجد ملاحظ فى عيد ميلادى ده ان فى ناااااااااااس كتيير افتكرتنى و كلمتنى مكنتش اتوقع انها تكلمنى + ناس كتير كنت متوقع ان اول ناس تكلمنى معبرونيش :) فعلا هى دى سنه الحياه
لكن الحمد لله اهم حاجه عندى عيلتى و كان يوم حو هنا بس خلاص بقى كبرنا احنا على موضوع العيد ميلاد ده يا دوب هو حته توروته و قطع يا عم و خلص

الخبر التانى

من 4 ايام كده اخيرا كملت تحميل لعبه فيفا 09 و لعبتها
فرق شاسع بينها و بين الاصدار اللى فات فى الجرافيك و طريقه اللعب و بقت اصعب فى الترقيص و حارس المرمى و بقت اسهل فى التصويب و التمريرات بس مليانه اللعبه ثغرات من ناحيه اللعب اون لاين ((على فكره كل ده برضه عرفته من موقع فيفا ستيشن)) بس اللعبه على المنجر موووووود جامده جدا بس مشكلتها الاوتو سييف :(

الخبر الثالث

قررت من بدايه الموسم الكروى انى اتابع فريقين و هم الزمالك و تشيلسى
لكن بعد 3 اسابيع اكتشفت ان الزمالك اصبح من احد فرق القاع مش القمه بجد الفريق ده عايز اداره جديده و دنيا تانيه لكن بالطريقه دى الواحد هيفضلل متعكنن طوول عمره


لكن لو قلنا تشيلسى الفريق ده يا ناس الاول على الدورى بالمشاركه مع ليفربوول و قدم عروض كرويه قويه جدا لغايه دلوقتى و اثبت انه فريق متكامل و ان اصابه لاعبيه مبياثرش على مستوى الفريق و ساركوزى من افضل مدربى العالم



لكن تعليقى الوحيد ان رتم تشيلسى بقى بطئ جدا عن الاول

الهجمه ايام مورينيهو كان تمريره التانيه التالته

لكن دلوقتى بيحضروا كتيير اوى بالكوره لكن برضه بيوصلوا للجون



عجبتنى اوى صوره بالاك دى قولت احطها هنا و على الفيس بووك و على توقيعى فى الفيفا ستيشن :)

قبل ما انهى المدونه احب اقولكم ان اختى سالتنى سؤال مقدرتش ارد عليه و ذلك لحالتى النفسيه الصعبه :@

بس انا هسيبكم انتم تردوا على السؤال ده

السؤال هو

من هو نجيب سويرس ؟؟؟؟







الأربعاء، 13 أغسطس، 2008

بسم الله الرحمن الرحيم

بعيد بقى عن اهلاوى و زملكاوى و فرحان و زعلان
النهارده المصرى اثبت ان حسام وصل معاه لاعلى مستويات التدريب
و عرف فعلا يصنع من انصاف نجوم فريق متكامل متفاهم مع بعض

الاهلى لعب بعشوائيه كبيره جدا و مكنش فى دفاع خالص
مفيش تفاهم بين محمد السيد و امير عبد الحميد زى ما انتم شفتوا فى المباراه
محمد السيد يسيب الكوره لامير و امير ميخدش باله يلحقها محمد فى اخر لحظه و يشوطها فى اى مكان

اول مره من ساعه ما اتولدت اشوف المصرى بيلعب بالطريقه دى
الكوره معاهم طوول المباراه تحركهم رائع جدا
لعيب الاهلى اللى يمسك كوره تلاقى مضغوط عليه و مش عارف يتصرف و اول ما تتقطع تلاقيهم انتشروا فى كل الملعب
امكانهم صح و الدفاع كان مرتكز فى المكان و الزمان مع كل كوره

الصراحه الثلاثى حسام و ابراهيم و طارق سليمان كان ليهم مفعول السحر على الفريق ده

حتى المباراه اللى دارها حلمى طولان و اتعادلنا مع الاهلى 2\2 بالعافيه كان العشوائيه فيها بزياده

الهدف الاول للمصرى النهارده لو تلاحظوا اتكرر اربع مرات و دخل فى المره الرابعه باقدام محمد جابر
جالهم 2 كورنر و 2 فاول من ناحيه اليمين و يلعبوها على القريبه و حد يلحقها و نجحت فى الاخر

الهدف الثانى قناوى كان صاحب الهدف من البدايه الهجمه و مش عارف تسديده الجباس ازاى اتصدت
برضه امير شال كور مش قليله

لكن للاسف...........
الحلو ميكملش
حسام و ابراهيم كل يوم بينفعلوا عن اليوم اللى قبليه و ده هياثر برضه فى لعيبه المصرى
النهارده الكاميرا جابته و هو بينطق بالفاظ اقل ما يقال عنها سوقيه
انا مش عارف الاتنين دوول ممكن يتوقفوا الدورى كله و يتفرجوا من المدرجات
لازم العميد يمسك اعصابه شويه عشان الفرحه تكمل

بجد انا فى اشد فرحى النهارده و البلد سهرانه للصبح

كان ليا واحد صاحبى بيقولى النهارده الصبح

من يضحك اخيرا يضحك كثيرا

يا ترى انت فين يا معلم؟؟؟

الأربعاء، 7 مايو، 2008

بين الحكومه و المواطن ..... يفتح الله


بسم الله الرحمن الرحيم



من ساعه ما الواحد قرا خبر رفع سعر البنزين و مش عارف يوصف الحكومه بايه
سعر البنزين 92 قفز سعره من 140 قرش الى 185 قرش و سعر البنزين 90 برضه سعره نط من 130 قرش الى 175 قرش (طبعا ملاحظين انى كاتب قرش عشان الواحد يكون عنده امل فى الحياه)

اهم حاجه و انت بتقرا الخبر ده تحس انك بيضحك عليك و حد بياخدك على اد عقلك ((انا اسف على التعبير لكن ملقتش حاجه توصف اللى احنا فيه الا كده)) انت نفسك هتقول كده بعد ما تقرا السطور اللى جاييه


1- الحكومه خلت سعر البنزين يزيد و رفعت الدعم عنه عشان هتتخذ سياسه جديده من نوعها و هى انها تاخد من الاغنياء و القادرين عشان تدى للغير قادرين

و ده لامؤاخذه على اساس ان كل العربيات اللى ماشيه فى البلد من نوعيه المرسيدس و ال BMW و الكوبيه و الكابورليه
طب و بالنسبه للناس اللى جايبه عربيات ب 8 و 9 الاف جنيه ((تحويشه العمر)) دول برضه من القادرين؟؟؟


2- تاكيد رئيس الوزراء ان سعر البنزين 80 لم يتغير و الخبر موجود على القناه الاولى


ده طبعا على اساس ان البنزين 80 مغرق المحطات و مش لاقى اللى ياخده

3- و دى اكثر نقطه غيظانى شخصيا و هى ان مجلس الشعب هو الى اقر و اعتمد الاسعار الجديده للبنزين - طبعا مع معارضه اكثر من 70 نائب لكن الاغلبيه

-

و هنا سؤال يطرح نفسه

هم مش النواب اللى تحت القبه دول مش المفروض انهم بيتكلموا بلسان الناس و بيدافعوا عن احوال الغير قادرين و ايه نظامهم
مش احنا انتخبناهم عشان يتكلموا بالنيابه عننا و لا علشان يعتمدوا الاسعار اللى هتخلص على طبقه الغير قادرين فى البلد

و لسه هنشوف الايام مخبيلنا ايه و ان كان ربنا ساترها معاك و معايا فما بالك بحال الغير قادرين اللى بيتزاحموا عشان يجيبوا رغيف العيش هيعيشوا ازاى فى الغلاء ده

يا خساره يا موظف ملحقتش تتهنى بال30% العلاوه و الزياده فى الاجر ((ما هو اكيد يعنى الحكومه مش هتدلك الزياده دون مقابل كده))

و على فكره لسه بقى اسعار الميكروباصات هتزيد عشان السولار بقى ب 110 قرش و طبعا المواد الغذائيه سعرها هتزيد لان سعر البنزين اللى بيمشى العربيات اللى بتنقل الغذاء زاد

من الاخر.....بسن الحكومه و المواطن..... يفتح الله

و نراكم على خير دايما ...... و اياكم و التشاؤم

السبت، 26 أبريل، 2008

مكتبناش من زمان ...... قلنا نقول اللى فى قلبنا

بسم الله الرحمن الرحيم

من زمان جدا مكتبتش موضوع من قلبى بجد و وحشتنى الكتابه

لكن المشكله انى مش لاقى حاجه تنكشنى كده و تخلينى اهرش فى شعرى و اقول اللى فى نفسى
عامتا المره دى هنقول على كام حاجه بسيطه



اول حاجه اكتشفتها ان من ساعه ما منتدى مدرسه المشاغبين اتقفل و انا حاسس انى ناقصلى حاجه بجد

ناقص اشوف اخواتى اللى اتعرفت عليهم و احس بنخوتهم و خصوصا ان المدرسه كانت بيتى على الانترنت


نفسى ايام المدرسه ترجع تانى بجد حتى لو بدئنا من الصفر


لكن مع غياب المدرسه اكتشفت منتديين انا دلوقتى نشيط فيهم نسبيا



اولا منتدى فيفا ستيشن














منتدى مهتم بالفيفا 2008 كمقام اول و بصراحه عجبنى الشغل و التنظيم فيه و الاهتمام بتزويئ المواضيع و الجرافيك



و بعدها لما دخلت على المواضيع العامه عندهم افكار كتير حلوه و مسابقات لذيذه جدا و بتعمل روح تنافس اكثر من ممتاز و خصوصا مسابقه الاسئله



ده غير الاوسمه و الكوؤس اللى تنشط النائم و اهتمام المشرفين بالمنتدى



الصراحه انا متوقع ان المنتدى ده هيوصل لدرجات عاليه جدا و بصراحه انا اتفعلت معاهم جدا و كتر خير اخويا ((ابو دماغ عاليه))



ده الاسم الحركى ليه فى المدرسه






ثانيا منتدى الفريزون










اهو بقى المنتدى ده اللى حكايه بجد



هو مشكلته كلها النشاط ضعيف جدا ....مش فى الردود....و لكن فى عدد الاعضاء المتفاعله



الصراحه الناس اللى فيها دلوقتى انا شايف انهم مهتمين المنتدى جدا و عندهم افكار اكثر من رائعه



و اكتر حاجه شدتنى فيها الاعمال الخيريه و الرحلات المواظبين على عملها و احلى حاجه انهم كلهم بورسعيديه



و اعتقد ان اى فكره بيطلعوا بيها بتلاقى قبول تام و اعتقد ان لو طلعت فى دماغى فكره حلوه هلاقى الناس اللى تتقبلها









ثالثا موقع فيستا فور عرب






موقع واحد صديق ليا اشتراه و الصراحه تعب فيه جدا و غير نشاطه اكثر من مره



عايز يوصل لاقصى استفاده للناس و عايز افكار جديده يقدمها بواسطه الموقع ده



فكرته اننا كمصريين مش اقل من اللى عملوا الفيس بووك و لا المواقع الاخرى فى حاجه و اننا نقدر نبدع و احسن منهم



و انا الصراحه معاه بس برضه المشكله انى لغايه دلوقتى ازمه الافكار اللى مش موجوده عندى دى ماثره خالص



تانى حاجه هو الفوتوشوب

دى صوره بسيطه عملتها بالفوتوشوب و انا قاعد مره فاضى لان النت كان قطع ساعتها

و ان شاء الله تعجبكم











يلا دى حاجه بسيطه كده لغايه ما ابقى ارجعلكم تانى





الاثنين، 31 مارس، 2008

اضراب 6 ابريل .... بين التحقيق و الالغاء

بسم الله الرحمن الرحيم


اكيد كلكم عرفتم عن موضوع اضراب 6 ابريل من الحمله اللى بيعملوها افراد كثير من كذا جهه معارضه على الانترنت

الموضوع فعلا انتشر جدا و نجحم انهم يوصلوا فكره الاحمله اوا الاضراب بالاصح فى وقت قصير جدا

و ان كان ده بيدل على شئ فبيدل انا الشعب المصرى كله بيعانى من نفس المشاكل مع اختلاف المسميات

و لو نجح هذا الاضراب فى تحقيق شئ فده معناه اننا وقفنا مع بعض بايد وحده


اضراب 6 ابريل



اول ما سمعت الكلمه دى قولت خير اللهم اجعله خير....هى البلد اخيرا فاقت و هيتظاهروا ضد الغلاء اللى فى البلد

اخيرا هيوحدوا صفوفهم فى مظاهره سلميه مش هتادى لخسائر.....و لا لخساره ارواح بشريه

اخيرا هييجى اليوم اللى اسمع فيه فى الاخبار ان شعب مصر وقفه وقفه رجاله بعد ما كانوا فى غيبوبه بقالهم سنين


يوم 6 ابريل.....يوم غضب الشعب المصرى


الصراحه انا مع فكره الاضراب ده جدا و خصوصا لو فعلا هيوصل للحكومه عن حجم المعاناه اللى بيعنيها الشعب المصرى بسبب الاحوال الغير مرضيه بالمره اللى عماله تتغير حوالينا و اهمهم فى رايي الغلاء ((سواء بقى كان السبب الحكومه او رجال الاعمال))


اهم المطالب


عايزين


عايزين تعليم لأولادنا، عايزين مواصلات آدمية، عايزين مستشفيات تعالجنا، عايزين دواء لأطفالنا، عايزين قضاء منصف، عايزين أمن وأمان، عايزين حرية وكرامة، عايزين شقق وعرسان.


مش عايزين


مش عايزين رفع أسعار، مش عايزين محسوبية، مش عايزين ضباط بلطجية، مش عايزين تعذيب في الأقسام، مش عايزين إتاوات، مش عايزين فساد، مش عايزين رشاوي، مش عايزين اعتقالات، مش عايزين تلفيق قضايا.


اضراب 6 ابريل ..... مصر كلها مش هتنزل من بيتها

السبت، 8 مارس، 2008

الكلمه الاولى

بسم الله الرحمن الرحيم

الكلمه الاولى

هى الصراحه مش كلمه واحده بس انا قولت بما انها بدايتى فى المدونات قولت الاقى عنوان كويس
ايوه بدايتى فى المدونات بس مش الهدف منها انى الاقى شعبيه
انا عاملها عشان اكتب اللى جوايا و هو ده الهدف من المدونات عامتا على حد علمى
الصراحه انا اعرف عن المدونات من زمان اوى و يمكن اكون داخلها متاخر اوى
بس دخلت دلوقتى فى دماغى انى اعمل مدونه يمكن تكون حاجه جديده اقدر افش فيها غليلى و اعبر عن فرحتى
و اللى شجعنى دلوقتى هو انى دخلت على مدونه اسكندرانيه ((عضوه فى منتدى مدرسه المشاغبين بيتى فى النت)) قلت اشمعنى انا يعنى
يعنىالاسكندرانيه احسن من البورسعيديه فى ايه يعنى ((من اولها هاعمل فيها دكر))
طبعا بهزر انا بكن كل احترام لاسكندرانيه و كمان انا لسه زاير اسكندريه من قريب

المهم
انا كنت عايز اسمى المدونه ((مصراوى متفائل)) لانى مضايق جدا للي بيشتموا فى البلد و شايفين الحياه بنضاره سودا
هو صحيح كل حاجه فى الدنيا غلت و قليل لما تلاقى حاجه عدله
لكن مش هنفضل طول عمرنا نشتم فى البلد و فى الحكومه....لازم نبدا من نفسنا بقى
نعمل اللى احنا نقدر نعمله بايدينا
و اكيد برضه نعبر عن مشاكلنا و نحاول نحلها
طبعا مش انا بقى اللى هاثر على الناس و هخلى الدنيا ورد و بمبى
ده انا دول عمرى بغنى ((الحياه بقى لونا بنى...)) مع الاعتذار للفنانه سعاد حسنى

بس مرضتش اسميها كده لان ليا صديق معرفه مسمى نفسه فى المدرسه ((مصراوى)) فمشيت تبع الحقوق الفكريه الملكيه

عامتا عشان مطولش عليكم يا رب مكونش تقيل فى كلامى و يا رب اعرف اطلع اللى جوايا بطريقه صحيحه
و كفايه ان المدونه اسمها ((ابن بورسعيد)) و دى يكفينى شرفا

و لا انتم ايه راييكم؟؟